Shu munosabat bilan, Siz, azizlarni bugun mamlakatimizda keng miqyosda nishonlanayotgan qutlug‘ kasb bayramingiz bilan chin qalbimdan muborakbod etaman. Qurilish va bunyodkorlikdagi asriy an’analarni asrab-avaylash bilan birga ijodiy rivojlantirib, ekologik toza va xavfsiz texnologiyalar, ilg‘or muhandislik ishlanmalarini keng joriy etayotganingiz bugun har qancha tahsinga loyiq. Ayniqsa, hayotimizning barcha soha va tarmoqlarida katta qurilish va obodonlashtirish ishlari jadal olib borilayotgan shu kecha-kunduzda sizlarning mas’uliyatli va sharafli mehnatingiz ko‘lami hamda ahamiyati tobora ortib bormoqda, desak, ayni haqiqatni aytgan bo‘lamiz.

Xalqimiz oqqan daryo oqaveradi, deb bejiz aytmagan. Bugun bunyodkorlikda Sharqning mumtoz va Gʻarbning zamonaviy an’analarini uyg‘unlashtirgan izlanishlaringiz tufayli viloyatimizning shahar va qishloqlarida ham yangi-yangi me’moriy asarlaringiz, ishlab chiqarish korxonalari, muhim ijtimoiy soha ob’yektlari, zamonaviy uy-joylar, yo‘l va ko‘priklar barpo etilib, hayotimiz go‘zal, turmushimiz farovon bo‘lmoqda. Raqamlarda ifoda etsak, birgina joriy yilning birinchi yarmida viloyatda qurilish-pudrat ishlari hajmi 6 trln so‘mni tashkil etgani mamlakatimizda iqtisodiy barqarorlik va oqilona siyosatning ifodasidir.
  
Hurmatli quruvchilar!

Bugungi kunda Yangi O‘zbekiston taraqqiyot strategiyasi doirasidagi barcha islohotlarimizda inson qadri va uning hayotiy manfaatlari ustuvor tutilgan. Ushbu ulug‘vor vazifalarni amalga oshirishda boshqa sohalar qatori qurilish sohasi, uning ulkan imkoniyatlari hal qiluvchi ahamiyatga ega. Shu maqsadda aholi punktlarini qurishga kompleks yondashilib, uy-joy, turli bino va inshootlar bilan birga ijtimoiy infratuzilma ob’yektlari, savdo va xizmat ko‘rsatish shoxobchalari, ta’lim, tibbiyot va madaniyat muassasalari, istirohat bog‘lari va xiyobonlar, favvoralar, bolalar maydonchalari va sport maskanlari bunyod etishga markazlashtirilgan dasturlar doirasida barcha manbalar hisobidan 1,3 trln so‘m mablag‘ yo‘naltirilib, 302 ta ob’yektda qurilish va ta’mirlash ishlari amalga oshirilayotgani buning amaliy tasdig‘idir. Ishonchim komil, o‘z ishining chinakam ustasi bo‘lgan Siz mohir quruvchilar va mutaxassislar, sohada mehnat qilayotgan barcha insonlar o‘zlarining bor kuch-g‘ayrati, bilim va tajribangizni ana shunday ulkan vazifalarni muvaffaqiyatli ado etishga safarbar etasiz.

Siz, azizlarni kasb bayramingiz bilan yana bir bor chin qalbimdan tabriklab, barchangizga sihat-salomatlik, oilaviy baxt va xonadonlaringizga qut-baraka tilayman. Yaratuvchan qo‘llaringiz hech qachon dard ko‘rmasin, halol mehnatingiz ortidan topganingiz yaxshi kunlaringizga buyursin!